خلوة مع الشيـ,ـطان بقلم الكاتب احمد محمد شرقاوي

أبويا الله يرحمه اتـ,ـوفى من تلت شهور بس ورغم دراستي بقيت مضطر أشتغل جمب الدراسة عشان أصرف على أمي واختي الصغيرة اللي لسة مكملتش تمن سنين بس, ورغم ان مـ,ـوت الأب بيساوي كسرة الضهر إلا إني أقسمت من جوايا اني أقف على رجلي ومخليش أمي واختي محتاجين أي حاجة.. وبما اننا كنا قاعدين في شقة إيجار وشغلي كان بعيد عن المنطقة نوعا ما فاقترحت على أمي اننا نأجر شقة قريبة من مكان شغلي خاصةً ان الإيجار أرخص وكمان هوفر فلوس المواصلات, وأمي لما لقتني راجل يعتمد عليه مبقتش بتقولي لا على أي حاجة, وفعلا جبت عربية ولمينا العفش وروحنا لشقة أرخص شوية وإن كانت في نفس مستوى المعيشة.

. والأحسن انها كانت في منطقة هادية وكمان الشقة اللي قدامنا مش مسكونة, وانا كنت بحب الهدوء وده خلاني اتفائل نوعا ما بالموضوع, واستقرينا في الشقة وقدمت لاختي في مدرسة قريبة وعدينا أول تلت شهور في المنطقة وكسبنا محبة أهل المكان وبقينا وكأننا عايشين وسطهم من زمن طويل.. لحد ما في ليلة كنت راجع من الشغل وطلعت لحد الدور اللي احنا فيه واتفاجئت بقط سود واقف على السلم, كان واقف زي البشر بالظبط واتخض أول ما ظهرت وقام نازل تاني على أربع رجول ووقف يبصلي بصة مخـ,ـيفة, كان قط شكله بشع, مُخيف, وشه مكرمش زي العواجيز وعين من الاتنين محمرة كأن فيها مرض, ووقف يموء بطريقة شرسة ناحيتي, تجاهلته بخوف ودخلت شقتي.

. حطينا الأكل عشان نتعشى ودردشت مع أمي اني لقيت قط على باب البيت عشان تقولي ان ده قط الست درية وانها جت تسكن في الشقة اللي قصادنا انهاردة بس, مش عارف ليه قلبي اتقبض, وسألت نفسي ايه اللي يخلي واحدة ست زي دي تربي قط منظره بشع بالطريقة دي.. بس تجاهلت الموضوع ونمت, بس السيء ان القط كان واقف على سلم العمارة وبالأخص قدام شقتنا يموء بصوت بشع طول الليل, لدرجة اني كنت خـ,ـايف أفتح باب الشقة وأبعده, وده خلاني معرفتش أنام تقريبا طول الليل وقمت الصبح وانا في حالة مزاجية سيئة جدا جدا.

. اتكلمت مع أمي فقالتلي انه مجرد حيوان ولازم نتحمل ومش عايزين نعمل مشاكل مع حد, وكبرت دماغي تاني, بس استمر الحال لمدة اسبوع كامل, صوت مواء مخيف كل ليلة من على السلم, صوت يدمر الأعصاب ويخليك مش قادر تتحمل, وكأنه بيكسر أعصابك تماما.. لحد ما في ليلة زاد صوت المواء, زاد بطريقة مخيفة, لدرجة اني خرجت من باب الشقة وانا في قمة غضبي, بصيت للقط ولقيته كان برضه واقف على رجلين مش أربعة, تجاهلته رغم اني كنت خايف وخبطت بغضب على الست درية, وبعد لحظات فتحتلي, كانت أول مرة أشوفها, ست عاملة زي السـ,ـاحرات العواجيز, عجوزة ووشها مكرمش وكأنها شبه القط بالظبط, وعنيها فيها كمية خُبث غريب, وقفت تبصلي بصة غريبة, خدت نفس عميق وقولتلها: - يا ست احنا مش عارفين ننام بسبب القط بتاعك ده فضلت بصالي ومبتردش اطلاقا, وده خلاني أغضب اكتر وقولت: - لو مشوفتيش حل في القط ده انا هتصرف فيه ومتزعليش مني هنا اتكلمت بصوت هادي تماما وناعم كأنه صوت بنت عشرينية مش عجوز وقالت: - متأكد من كلامك ده - تصدقي بالله انك ست معندكيش ذوق مردتش على كلامي ونادت على القط وهي مبتسمة ابتسامة غريبة وقالت: - تعالى يا جعفر ادخل جوة ضحكت بتهكم وقولت: - وكمان اسمه جعفر ودخل القط ببرود مستفز للشقة ولقيت أمي وقتها خرجت وهي قلقانة واعتذرت للست أكون قلت كلمة وحشة وشدتني على جوة بسرعة, الغريب اني شوفت في عيون أمي خوف غريب, تجاهلت الموضوع ودخلت أنام, كنت مرهق جدا بسبب شغلي اللي بيحتاج مجهود بدني عالي.